Sizin küçənizdən ötdüm bu payız…
**
Sizin küçənizdən ötdüm bu payız,
Bomboşdu küçələr-adam yox idi.
Bumbuz şüşələrin naxışlarında,
Daha yazmamışdın-adım, yox idi.
Bir ayaq səsinə, yarpaq səsinə-
Səni qısqanırdım çoxuna, niyə?
Sənsiz yuxularım ərşə çəkilib-
Gəlmirsən gecələr yuxuma, niyə?
Yolboyu, ağaclar burda pərişan,
Sanki yollar ayrı, döngələr ayrı.
Düşür budağından xəzəl yarpaqlar,
Bir-bir ötüb keçən kölgələr ayrı.
Qaldıra bilmirəm baxışlarımı,
Gözlərim üşüyür ayaq izində.
Bir az yoxluğumda ağla, əzizim,
Beləcə, saxlama məni gözündə.
Daha bu payız da, o payız deyil,
Yağmır saçlarıma sevgi damlası.
Bir öpüş-Ahh!..-çəkir, dodaqlarında,
– Səni gözləyirəm qayıt, qadası!..
Şakir Məhbusi, Türkiyə Kültür-Sanat-Edebiyat ödülçüsü.
Bir Cevap Yazın